Japonism: 2016

鹿兒島 - ふなっしー開心樂園餐

2016年9月17日 (大雨)

行程: 香港>鹿兒島機場>鹿兒島中央站>POKEMON SHOP>天文館>熊襲亭>麥當奴

行完POKEMON SHOP, 食完「熊襲亭」, 仲未返得酒店住。

首先去咗超市同驚安買返少少水同糧食, 之後仲去咗碼頭個邊間麥當奴。

去到日本仲食麥當奴?! 全因兒童樂園餐啱啱推出咗ふなっしー公仔。

9月17-19日買餐仲有貼紙送添, 因為頭一星期可以換4款公仔, 2話不說就掃咗4個開心樂園餐, 掃完之後成個人開心晒, 哈哈。

本開心樂園餐有迷你熱香餅, 仲要咁夜時間都有, 好得意, 點解香港冇?

同場仲有加多個白桃忌廉批, 真係好cream, 味道一般啦。

完成今日的任務剛好係0:00, 可以安心返酒店休息了。

2016年9月17日 (大雨)

行程: 香港>鹿兒島機場>鹿兒島中央站>POKEMON SHOP>天文館>熊襲亭>麥當奴

離開POKEMON SHOP, 一出商場就超級大雨, 本來想行去天文館都唔得, 要坐返轉巴士。

基本上已經全濕咁去到酒店, 放低行李又走去食飯了。係酒店附近, 我地就去咗間黑豚店- 「熊襲亭」

我地一人叫咗一個黒豚しゃぶ鍋餐, 而其中2個就飯再加500日元, 將白飯變為「酒壽司」。

說實在, 黒豚令人十分失望。同預期相差太遠了, 好似香港普通的肉片一樣, 冇乜特別的豬味, 又唔係特別嫰, 3,000日元一個餐, 完全唔值。幸好有叫到「酒壽司」, 算係呢餐飯的亮點, 有少少似酒釀丸子味。

鹿兒島 - POKEMON SHOP

2016年9月17日 (大雨)

行程: 香港>鹿兒島機場>鹿兒島中央站>POKEMON SHOP>天文館>熊襲亭>麥當奴

台風吹唔正香港, 我地就順利抵達鹿兒島機場。

對上一次黎, 已經係2年前的事, 不過記憶猶新, 拎完行李, 好快就出去2號巴士站等巴士了。

今晚住就住天文館附近, 不過我同朋友就先係中央站潮聖一下先。

最近捉精靈捉得好開心, 難得可以去POKEMON SHOP睇下又點會錯過呢, 話時話, 一落車已經捉到隻卡美龜, 哈哈, 寫住鹿兒島, 要好好珍藏。

去到AMU PLAZA, 直上四樓就見到POKEMON了。

睇咗一陣, 係咁易買咗枝百變怪原子筆做紀念品, 就走了。

鹿兒島 - 八幡 (黒豚しゃぶ鍋)

2016年9月20日 (晴)

行程: 鹿兒島中央站>屋久島碼頭>LOFT>知覽 - 特攻平和記念館>鹿兒島中央站>八幡

遊完一輪，本來想去天文館間「黑豚料理あぢもり」，點知去到竟然full house。最後兜咗唔知幾多個圈都係揀唔到自己心水餐廳，唯有由"天文館"又行返去"鹿兒島中央"站。

本來目標去「六白亭」一試，途經「八幡」個門口又好似幾ok，價錢又ok，就決定轉軚了。

我地被安排去咗2樓最埋邊，又有門簾，自成一角，非常好。

黒豚しゃぶ鍋可以揀唔同湯底，竟然有個綠茶款！超想試，可惜要2人份量起，為有同行朋友著想，只好放棄。最後揀咗比較大眾化的"和汁" - 鰹、鰯、鯖等魚的湯+"鹽豬汁" - 豬骨&鹽。8個湯底除咗1, 2同8之外, 其他都可以揀鴛鴦鍋。

最初個次, 都有個人示範下應該落乜, 其後就要靠自己了。

2個湯底比較之下, "和汁"淥完個豬, 再加豉油+蘿蔔溶簡直係絕配! 超級好味!!

反而"鹽豬汁"雖然湯底有少少柚子香, 都唔錯, 但比係個蘿蔔溶就差少少啦

打邊爐咁開心, 梗係要配返少少酒先夠爽, チューハイ竟然桃味, 荔枝味都ok啦

肉其實都好似唔係好多, 但已經飽飽仔, 本來食完肉佢仲可以幫我地整個雜煮, 但太飽食唔到, 就直接上甜品了, 是日生果。

「八幡」雖然冇「あぢもり」咁專業, 但價錢相對地相宜, 而且quality都唔錯, 他朝有機會再去鹿兒島, 都想試下佢個綠茶湯底。

知覽 - 特攻平和記念館

2016年9月20日 (晴)

行程: 鹿兒島中央站>屋久島碼頭>LOFT>知覽 - 特攻平和記念館>鹿兒島中央站>八幡

「ふなっしー LAND」完, 鏡頭又轉到「知覽 - 特攻平和記念館」。

講到神風特攻隊, 好多人第一時間會聯想到由岡田准一主演的「永遠的零」。原來2007年, 仲有一部電影專描述特攻隊員的故事 - 「僕は、君のためにこそ死ににいく」, 中譯「吾為君亡」。

電影取景地點正正就係「知覽」，部分戰機係拍攝後放係館內或外做參考。

「知覽」因為地勢、地理、天氣關係，當年特攻隊大部份成員都係由呢度個臨時機場出發, 飛過「開聞岳」去沖繩作最後一場戰役。後來機場拆了, 係某一角落起咗「特攻平和記念館」,紀念神風特攻隊的事跡，而加係附近仍然保留咗好多歷史遺跡。

例如：

三角舍 - 避免受到空襲，當時的三角舍係建係樹林中，以半地式木材建造。特攻隊收到命令後, 就會躲係呢個三角舍入面, 等待最佳最時機出發, 期間會寫下遺書比至親、食飯、休息。當時三角舍位置建了一個碑以作紀念，而平和館側就復原返當年的三角舍, 朋友話: 難怪仲有一陣"佬味"。

水塔 - 水塔附近就係特攻隊紮帳篷上堂、食飯的地方。水塔係主要飲用水來源，但地點太遠都冇專程行去睇清楚。

「神風」呢個名可以話係一般人對特攻隊的統稱。「神風」呢個名，源自兩個曾經令日本避過攻擊的台風。後來，特攻隊正式成立後，取其名「神風」亦希望憑這次反擊下，令日本反敗為勝，有奇蹟出現。

以前對特攻隊唔太熟識，以為揸親「零戰」就係特攻隊。但完全唔係個回事。特攻隊有分海、空兩個大範疇，每邊再細分多個支隊，當然有揸「零戰」的，但仲有其他戰鬥機的, 如「隼」、「櫻花」等。海軍方面就有「回天」、「震洋」、「伏龍」等等。基本上都係以卵擊石的方法, 係自殺式的攻擊。

好多人都會問，明知咁樣做同自殺冇分別，點解仲會出發呀？佢地係咪傻架？一定係被洗腦啦。其實最初參與特攻隊的人，好多都係自願，係國家存亡緊張關頭之下，總有愛國、視呢場戰爭為聖戰、為天皇而戰的人，營造到呢個氣氛，當時傳媒應記一＂功＂。但後來參與特攻隊的年輕人，大部份其實都唔係自願，呢一點應該唔難想像吧。

「特攻平和記念館」有好多成員的親筆遺書、遺照、遺物。除咗模型之外，更有修復版的真戰機展示，另外仲有好多珍貴的相、短片，甚至講座，仲有個特別展 - 「20歳-はたち-の特攻」，展示一下當時年青人的玩意，刊物等。

整個館同靖國神社旁的「遊就館」一樣，好多資料，未太仔細睇，轉一個圈已經2小時了。可以黎到呢度，更了解、感受下當時的情況，實在難得，好彩我堅持將呢個「特攻平和記念館」放入行程，來回坐車需時，但不枉此行。

歷史野唔係人人有興趣或者會慢慢睇，朋友都係陪行，最初都驚悶親佢，點知佢都認為值得去睇，甚至係呢個旅程的亮點！感動ING。每一次睇有關戰爭的展覽，睇完都有種悲傷，老土仔上身都要講句，真係希望世界和平！

參觀前已經想食LUNCH，但無奈附近的餐廳都約埋星期二休息，連知覽茶雪糕都冇得食。

冇選擇的情況下，唯有去便利店買飯團 = =，幸好仲見到7月限定白桃雪糕, 有返啲安慰。

附近環境真係好靚!!! WALLPAPER一樣

鹿兒島期間限定店ふなっしー Funassyi LAND

2016年9月20日 (晴)

行程: 鹿兒島中央站>屋久島碼頭>LOFT>知覽 - 特攻平和記念館>鹿兒島中央站>八幡

如夢初醒，因為台風關係，驚被困係屋久島，所以尋日(9月19日)突然轉咗飛機返鹿兒島。朝早食過東橫INN早餐之後，就急急腳去返屋久島碼頭退回早前已經買好的船飛。

朝早睇天氣報告已經知道, 台風已經掠過九州南部, 去到四国其他地方, 所以9月20日的船一定可以如期航行。由於突然折返鹿兒島係個人決定, 船公司只可以退回7成船飛錢, anyway, 點都好過乜都冇。(後記: 9月26日亦都順利收返7成錢了。)

途中經過天文館就去買「のったりおりたり」車票, 繼續今日同聽日的行程。

完成2件要做的事, 大慨係12點, 仲有約40分鐘先夠鐘坐巴士去「特攻平和記念館」, 於是就去咗「ふなっしー LAND 鹿兒島期間限定店」。

一上到三樓, 成個CORNER都係ふなっしー。本來冇乜心機, 一睇到佢就成個精神返晒。

當日買滿1,000日元, 仲有鹿兒島紀念卡、鹿兒島版膠袋一個送, 太可愛了。

我只係買咗4張POSTCARD, 咁就1,000日元了。

臨走前仲寫咗MESSAGE比梨仔。唔知佢收唔收到?? 笑

另外仲買咗特價盒蛋, 100日元一粒, 好過去抽扭蛋啦。

(圖: 呢款杯綠子, 300日元一隻, 一抽仲要同款!!! SHOCK~)

買完心頭好, 原來已經12:40分, 仲有3分鐘架巴士就埋站了, 最後竟然要怒奔街頭, 好彩追到架巴士。望望錶真係12:43分, 日本人之準時實在令人佩服。

指宿 - 池田湖

2016年9月21日 (晴)

行程: 鹿兒島中央站>指宿站> 龍宮神社+長崎鼻>池田湖>指宿站>鹿兒島中央站

去完「長崎鼻+龍宮神社」 , 接住就立即出發去「池田湖」了，途經「唐船峡」站，係最出名食流水麵的地方，本來計劃睇完「池田湖」就回頭嘆返個lunch，點知巴士經過時，我睇到門口楝住個牌寫「本日終了」。我以為自己睇錯，點知一上官網睇時... ...